7.11 E Reino durante mil aña

 

1. Kua teksto ta trese e Reino di mil aña bon kla den lus?
Revelashon 20:4 I mi a mira trononan, i nan a sinta riba nan i nan a wòrdu pèrmití pa huzga. I mi a mira e almanan di esnan ku nan kabes a wòrdu kitá afó pa motibu di e testimonio di Jesus i pa motibu di e palabra di Dios, i esnan ku no a adorá e bestia ni su imagen, i ku no a risibí e marka na nan frenta i na nan man; i nan a bolbe biba i a reina ku Cristo pa mil aña.

 

2. Ken e santunan lo husga, segun Pablo?
1 Korintionan 6:1-3
1 Ken di boso, ora ku e tin un kaso kontra un otro ruman, ta tribi bai korte dilanti di e inhustunan i no dilanti di e santunan?
2 Of boso no sa ku ta e santunan lo huzga mundu? I si ta boso ta huzga mundu, boso no ta kompetente pa huzga e kasonan hudisial di mas chikitu?
3 Boso no sa ku nos lo huzga angelnan? Kuantu mas anto asuntonan di e bida aki?

 

3. Riba kua profesia Pablo a basá su deklarashon?
Daniel 7:21,22
21 Mi a sigui wak i e kachu ei tabata hasi guera kontra e santunan i tabata vense nan,
22 te ora ku e Ansiano di Dianan a bin, i huisio a wòrdu duná na fabor di e santunan di e Haltisimo, i e tempu a yega ku e santunan a poderá di e reino.

 

4. Kuantu resurekshon lo tin?
Juan 5:28,29
28 "No straña boso di esaki, pasobra e ora lo yega den kual tur ku ta den graf lo tende Su bos,
29 i lo sali; esnan ku a hasi bon, pa un resurekshon di bida, esnan ku a kometé maldat, pa un resurekshon di huisio.

 

5. Kua klase por tuma parti den e prome resurekshon?
Revelashon 20:6 Bendishoná i santu ta esun ku tin parti den e promé resurekshon; riba esakinan e di dos morto no tin poder, ma nan lo ta saserdotenan di Dios i di Cristo i lo reina huntu kunE pa mil aña.

 

6. Kiko Kristo lo hasi ku e santunan ora E bin?
Juan 14:3 I ora Mi bai i prepará un lugá pa boso, lo Mi bin atrobe i risibi boso serka Mi, pa kaminda Ami ta, boso tambe por ta.

 

7. Unda Juan a mira e santunan den un vishon?
Revelashon 7:9 Despues di e kosnan aki mi a wak, i ata un multitut grandi ku ningun hende no por a konta, di tur nashon i tur tribu i pueblo i lenga, pará dilanti di e trono i dilanti di e Lamchi, bistí na paña blanku i ku rama di palma den nan man;

 

8. Kiko ta pasa ku e malbadonan bibu ora Kristo bini?
Lukas 17:26-30
26 "I meskos ku a sosodé den e dianan di Noe, asina lo ta tambe den e dianan di e Yu di Hende:
27 nan tabata kome, nan tabata bebe, nan tabata kasa, nan tabata wòrdu duná pa kasa, te na e dia ku Noe a drenta e arka, i e diluvio a bin i a destruí nan tur.
28 "Tabata meskos ku a sosodé den e dianan di Lot: nan tabata kome, nan tabata bebe, nan tabata kumpra, nan tabata bende, nan tabata planta, nan tabata traha kas;
29 ma riba e dia ku Lot a sali for di Sodoma a yobe kandela i swafel for di shelu i a destruí nan tur.
30 "Lo ta meskos riba e dia ku e Yu di Hende wòrdu revelá.

 

9. Kiko Pablo ta bisa tokante e asuntu aki?
1 Tesalonisensenan 5:3 Mientras ku nan ta bisa: "Pas i siguridat!" pèrdishon lo bin riba nan direpiente, manera doló di parto riba un muhé na estado; i nan lo no skapa.

 

10. Ki deskripshon Jeremias ta duna tokante e tera durante e tempu di e mil aña?
Jeremias 4:23-26
23 Mi a wak riba tera, i ata, e tabata sin forma i bashí, i na e shelunan, i no tabatin lus.
24 Mi a wak e serunan, iata, nan tabata tembla, i tur e seritunan tabata move bai bin.
25 Mi a wak, i ata, no tabatin ningun hende, i tur e parhanan di shelu a hui bai.
26 Mi a wak, i ata, e tera fruktifero a bira un desierto, i tur su statnan a wòrdu bashá abou dilanti di Señor, dilanti di Su rabia ardiente.

 

11. Kon Isaias ta bisa di e malbadonan durante e tempu aki?
Isaias 24:21,22
21 Asina lo sosodé den e dia ei ku Señor lo kastigá e ehérsito di shelu, den haltura, i e reinan di tera, riba tera.
22 Nan lo wòrdu reuni huntu, manera prezonan den kashòt, i lo keda será den prizon; despues di hopi dia nan lo wòrdu kastigá.

 

12. Pa kuantu tempu Satanas lo wòrdu será presu riba e tera aki?
Revelashon 20:1-3
1 I mi a mira un angel ta baha for di shelu ku e yabi di e abismo i un kadena grandi den su man.
2 I el a gara e dragon, e kolebra di antiguedat, kende ta diabel i Satanás, i a mar'é pa mil aña,
3 i a tir'é den e abismo, i a sera i seya esaki ofer di djé, pa e no gaña e nashonnan mas, te ora ku e mil añanan a keda kumplí; despues di e kosnan aki e mester wòrdu gelòs pa un tempu kòrtiku.

 

13. E mortonan hustu ta wòrdu lanta na e segunda binida di Kristo. Ki ora e sobra mortonan , e malbadonan, lo wòrdu lantá?
Revelashon 20:5 E restu di e mortonan no a bolbe biba te ora ku e mil añanan a keda kumpli,

 

14. Ki kambio ta bin den e situashon di Satanas na fin di e mil añanan?
Revelashon 20:3 i a tir'é den e abismo, i a sera i seya esaki ofer di djé, pa e no gaña e nashonnan mas, te ora ku e mil añanan a keda kumplí; despues di e kosnan aki e mester wòrdu gelòs pa un tempu kòrtiku.

 

15. Kiko satanas ta hasi ora e malbadonan a wòrdu lantá?
Revelashon 20:7,8
7 I ora ku e mil añanan keda kumpli, Satanás lo wòrdu gelòs for di su prizon,
8 i lo sali pa gaña e nashonnan ku ta keda den e kuater skinanan di tera, Gòg i Magòg, pa reunî nan pa guera; nan kantidat ta manera e santu kantu di laman.

 

16. Kontra ken e malbadonan lo marchá pa hasi guera i kiko lo ta e resultado?
Revelashon 20:9 I nan a subi bin riba henter e hanchura di tera i a rondoná e kampamentu di e santunan i e stat stimá; i kandela a baha for di shelu i a devorá nan.