11. E Bida solamente den Kristo

11.9  Spiritismo 

 

1. Kon spiritismo ta wòrdu deskribí?
E kerensia ku despues di morto hende ta kontinuá nan éksistensia personal komo un spiritu i bou di sierto sirkunstansia e ta kapas pa tene kontakto ku su defuntunan

 

2. E siñansa aki tabata éksistí den tempu antiguo?
Levitiko 19:31 'No sigui tras di miradó di destino, ni spiritista; no konsultá ku nan pa wòrdu kontaminá dor di nan. Ami ta Señor boso Dios.

 

3. Kon Dios ta konsiderá hasidónan di bruha?
Malakias 3:5 "E ora ei lo Mi hala serka boso pa huisio; i lo Mi ta lihé pa testifiká kontra e hasidónan di bruha, kontra e kibradónan di matrimonio, kontra esnan ku ta hura falsu I kontra esnan ku ta defroudá e trahadó den su suèldo, ku ta oprimí biuda i wérfano, I kontra esnan ku ta nenga yudansa na stranhero, i ku no tin temor di Mi," e Señor di ehérsitonan ta bisa.

4. Kiko Dios ta bisa tokante e hipókritanan i e tovenarnan?
Jeremias 27:9,10
9 "I boso, no tende na boso profetanan, boso adivinadónan, boso soñadónan, boso hasidónan di bruha ni na boso tovenarnan, ku ta papia ku boso, bisando: 'Boso no mester sirbi rei di Babilonia. '
10 Pasobra nan ta profetisá mentira na boso, pa hala boso leu for di boso tera; i lo Mi saka boso afó i boso lo peresé.

 

5. Kon Moises a tene Israel na altura di e kosnan aki, prome ku nan a drentá Kanaan?
Deuteronomio 18:9-13
9 "Ora bo drenta e tera ku Señor bo Dios ta dunabo, no siña imitá e abomi-nashonnan di e nashonnan ei.
10 Entre boso no mag wòrdu hañá ningun hende ku ta hasi su yu hòmber òf su yu muhé pasa dor di kandela, ni ningun hende ku ta praktiká adivinashon òf ku ta praktiká bruheria, òf ku ta pronostiká, òf ku ta praktiká magia,
11 ni ningun hende ku ta plega hende, òf ku ta montadó of spiritista, òf ku ta konsultá ku e mortonan.
12 Pasobra ken ku hasi e kosnan aki ta un abominashon na Señor; i pa motibu di e abominashonnan aki Señor bo Dios lo kore ku nan for di bo dilanti.
13 Bo mester ta perfekto dilanti di Señor bo Dios.

 

6. Kiko e lei den Israel tabata bisa tokante hasidó di brua i spiritista?
Eksodo 22:18 No pèrmití pa un hasidó di bruha keda na bida.
Levitiko 20:27 Awor un hòmber òf un muhé ku ta montadó of spiritista mester wòrdu matá sigur. Nan mester wòrdu piedrá ku piedra; nan kulpa di sanger ta riba nan."

 

7. Ku kua otro kosnan Pablo ta menshoná bruheria, i kiko e ta bisa di e hendenan ku ta praktiká e kosnan aki?
Galationan 5:20-23
20 idolatria, bruheria, hostilidat, bringamentu, yalursheit, rabiamentu, pleitamentu, desakuèrdo, doktrina falsu,
21 envidia, buracheria, parandiamentu, i kosnan asin' aki, di kualnan mi ta spièrta boso di antemano, meskos ku mi a spièrta boso kaba di antemano, ku esnan ku praktiká sorto di kosnan asina lo no eredá e reino di Dios.
22 Ma fruta di e Spiritu ta amor, goso, pas, pasenshi, kariño, bondat, fieldat,
23 mansedumbre, dominio propio; kontra kosnan asina no tin lei.

 

8. Kiko mester hasi si nan pidíbo pa konsultá montadónan?
Isaias 8:19 I ora nan bisabo: "Konsultá ku e montadónan i e spiritistanan, kendenan ta papia ketu-ketu i ta murmurá"-no ta ku su Dios un pueblo mester konsultá? E mester konsultá ku e mortonan pa e bibunan?

 

9. Kiko apostel Juan ta bisa nos tokante e asuntu aki?
1 Juan 4:1 Stimánan, no kere tur spiritu, ma pone e spiritu nan na prueba pa mira si nan ta bin di Dios, pasobra hopi pro¬feta falsu a Sali bai den mundu.

 

10. Na kiko nan mester pone na prueba?
Isaias 8:20 Bai na e lei i na e testimonio! Si nan no ta papia konforme e palabra aki, ta pasobra nan no tin lus den nan.

 

11. Nos mester permití di wòrdu influensia dor di siñal i milagernan hasí dor di esnan ku ta purba pa hala nos for di Dios i su trabou?
Deuteronomio 13:1-4
1 "Si un profeta òf un sofiadó di soño lanta meimei di boso i dunabo un señal òf un milager,
2 i e señal òf milager ku el a papia ku bo di djé sosodé, i e bisabo: 'Laga nos sigui otro diosnan (ku bo no a konosé) i laga nos sirbi nan,'
3 bo no mester skucha e palabranan di e profeta ei ni di e soñadó di soño ei; pasobra ta Señor boso Dios ta pone boso na prueba, pa haña sa si boso ta stima Señor boso Dios ku hen ter boso kurason i ku henter boso alma.
4 Boso mester sigui Señor boso Dios i tin temor p'E; i boso mester warda Su mandamentunan, skucha Su bos, sirbiE i pega na djE.

 

12. E mortonan sa kiko e bibunan ta hasi?
Job 14:20 ,21
20 Semper Bo (Dios) ta triunfá riba djé i e ta sali bai; Bo ta kambia su aparensia i ta mand'é bai.
21 Su yunan ta wòrdu onrá, ma e (e morto) no sa esei; òf nan ta wòrdu umiyá, ma e no ta ripará esei.

 

13. E mortonan sa algu?
Salmonan 146:4 Su spiritu ta sali, e ta bolbe na tera; e mes dia ei su pensamentunan ta peresé.

 

14. Kua skritua ta ekskluí e pensamentu, ku e mortonan lo bini back na tera pa asosiá ku e bibunan?
Eklesiastes 9:6 Di bèrdat nan amor, nan odio i nan zelo a peresé kaba, i nan lo no tin parti mas den tur loke ta wòrdu hasí bou di solo.

 

15. Si milagernan ta wòrdu hasí dor di spiritunan, ku ta pretendè di ta nos amigunan ku a muri, na ken nos mester atrbuí esaki?
Revelashon 16:14 pasobra nan ta spiritunan di demoñonan ku ta hasi milagernan, ku ta sali bai serka e reinan di henter mundu, pa reuni nan pa e guera di e gran dia di Dios Todopoderoso.

 

16. Kiko lo ta un di e Karakteristika di e kaída di fe den ultimo dianan?
1 Timoteo 4:1 Ma e Spiritu ta bisa klaramente ku den e ultimo tempunan algun lo kai for di fe, dor di paga atenshon na spiritunan engañoso i doktrinanan di demoñonan,

 

17. Kon satanas ta gaña hendenan?
2 Korintionan 11:14 I no ta nada straño, pasobra Satanás mes ta disfrasá su mes komo un angel di lus.

 

18. Kua rol su sirbidónan (kompinchinan) ta hunga?
2 Korintionan 11:15 Pesei no ta nada straño si su sirbidónan tambe ta disfrasá nan mes komo sirbidónan di hustisia, kende nan fin lo ta segun nan obranan.

 

19. Satanas i su pionnan lo pretendé e binida di Kristo i hasi siñalnan i milagernan pa konfirmá su afirmashonnan?
Mateo 24:23,24
23 E ora ei, si un hende bis a boso: 'Mira, ata e Cristo aki,' Of 'At'E aya,' no ker'é.
24 Pasobra Cristonan falsu i profetanan falsu lo lanta, i lo hasi señalnan i maraviyanan grandi pa gaña, si ta posibel, asta e eliginan.

 

20. Kiko lo ta un di e ultimo siñalnan ku lo wòrdu hasi di e forma aki, pa kue hendenan den e trampa di siñansa falsu?
Revelashon 13:3,14
3 I mi a mira un di su kabesnan komo si fuera esaki a wòrdu heridá pa muri, i su herida fatal a wòrdu kurá. I henter tera a keda asombrá i a sigui tras di e bestia;
14 I e ta gaña esnan ku ta biba riba tera pa medio di e milagernan ku a wòrdu pèrmití na djé pa hasi den presensia di e bestia, bisando esnan ku ta biba riba ter a pa traha un imagen na onor di e bestia ku tabatin e herida di spada i ku a bolbe biba.

 

21. Kua Skritura ta mustra ku satanas, djies prome di e binida di Kristo, lo traha pa medio di poder partikular i milagernan engañoso?
2 Tesalonisensenan 2:8-10
8 I e ora ei e malbado ei lo wòrdu manifestá, kende Señor lo destruí ku rosea di Su boka i kaba kuné ku e resplandor di Su binida,
9 esta, esun kende su binida ta di akuèrdo ku e aktividat di Satanás, ku tur poder i señalnan i maraviyanan falsu,
10 i ku tur e engaño di inikidat pa esnan ku ta peresé, pasobra nan no a aseptá e amor pa e bèrdat, pa nan por wòrdu salbá.
Revelashon 12:12 Pa e motibu aki, regosihá, o shelunan i boso ku ta biba den nan. Ai di tera i laman, pasobra diabel a baha bin serka boso ku gran furia, sabiendo ku ta ked'é solamente un poko tempu mas."

 

22. Mientras hopi lo wòrdu tenta dor di e milagernan aki, i lo aseptá Kristunan falsu ku ta aperesé, kiko esnan, ku a warda i stima e palabra di bérdat i ku pasenshi warda e binida di Kristo, lo bisa?
Isaias 25:9 Anto den e dia ei hende lo bisa: "Mira, esaki ta nos Dios, riba Kende nos a spera pa E salba nos. Esaki ta e Señor, riba Kende nos a spera; laga nos regosihá i sea kontentu den Su salbashon."

 

23. Ki spiertamentu apostel Pedro ta duna nos?
1 Pedro 5:8 Sea sobrio, sea alerta. Boso atversario, e diabel, ta kana rònt manera un leon ku ta gruña, buskando ken e por devorá.