15. Amonestashonnan i Spiertamentunan

15.9  Kalumniá i Redashi          

 

1. Kiko e di nuebe mandamentu ta prohibí?
Eksodo 20:16 "No lanta testimonio falsu kontra bo próhimo.

 

2. Kua konseho Juan Boutista a duna e soldanan ku a puntr’e tokante e kaminda di bida?
Lukas 3:14 I algun sòldá tabata puntr'é, bisando: "I kiko ta di nos, kiko nos mester hasi?" I el a bisa nan: "No ranka plaka kita for di ningun hende, ni kalumniá ningun hende, i keda kontentu ku boso suèldo."

 

3. Kiko ta prueba di un hende perfekto?
Santiago 3:2 Pasobra nos tur ta trompeká na hopi manera. Si un hende no ta trompeká den loke e ta bisa, e ta un hende perfekto, kapas pa frena henter e kurpa tambe.

 

4. Ku ki palabranan Kristo a mustra e gran nifikashon di ta kuidadoso den loke nos ta papia?
Mateo 12:36, 37
36 I Ami ta bisa boso, ku hende lo duna kuenta riba e dia di huisio di kada palabra bano ku nan papia.
37 Pasabra segun bo palabranan lo bo wòrdu hustifiká, i segun bo palabranan lo bo wòrdu kondená."

 

5. Ken konosé nos palabranan prome ku nos ekspresá nan? konosí?
Salmonan 139:4 Promé ku tin un palabra riba mi lenga, ya Bo konosé esaki kaba, O Señor.

 

6. Kua signal e palabranan di un hendeta duna?
Mateo 12:34 Boso, generashon di víbora, kon boso, siendo malu, por papia loke ta bon? Pasobra for di abundansia di kurason boka ta papia.

 

7. Kua komportashon Skritura ta kondená?
Levitiko 19:16 'No kana kalumniá meimei di bo pueblo, i no aktua kontra bida di bo próhimo; Ami ta Señor.

 

8. Ku kiko e palabranan di un hasidó di redu ta wòrdu kompará?
Proverbionan 26:22 E palabranan di un hasidó di redu ta manera kuminda di boka dushi, i nan ta baha bai den e partinan di mas paden di hende.


9. Kiko ta e konsekuensia di djé?
Proverbionan 17:9 Esun ku tapa un transgreshon ta buska amor, ma esun ku ripití un asunto ta separá amigunan intimo,

 

10. Kiko lo tabata e resultado si no tabatatin hasidò di redu?
Proverbionan 26:20 Pa falta di palu, kandela ta paga, i kaminda no tin hasidó di redu, pleitu ta stop.

 

11. Di kiko Pablo tabatin miedu den e iglesia di Korintio?
2 Korintionan 12:20 Pasobra mi tin miedu ku kisas ora mi yega lo mi no haña boso manera mi ta deseá, i ku boso lo no hañami manera boso ta deseá; ku kisas por tin pleitu, envidia, rabia, divishon, kalumnia, redashi, arogansia, desòrdu;

 

12. Ki konsekuensia redashi i otro mal kosnan tin?
Galationan 5:14, 15
14 Pasobra henter e Lei ta keda kumplí den un solo palabra, esta: "Stima bo próhimo manera bo mes."!
15 Ma si boso ta morde i ta devorá otro, mira pa boso no wordu destruí un dor di otro.

 

13. Kon un lenga ku ta reda por wòrdu kastigá?
Proverbionan 25:23 Bientu di nòrt ta kore ku awaseru, i un kara rabiá ku un lenga ku ta kalumnia.

 

14. Na ken e promesa ta wòrdu duná ku e lo biba den Tabernakulo di Señor i lo biba riba Su Seru Santu?
Salmonan 15:2, 3
2 Esun ku ta kana den rektitut i ta hasi hustisia, i ta papia bèrdat den su kurason.
3 E no ta kalumniá ku su lenga, ni ta hasi malu na su próhimo, ni ta lansa reproche kontra su amigu;

 

15. Ki spiertamentu ta wòrdu duná tokante akusashon kontra un ansiano?
1 Timoteo 5:19 No aseptá un akusashon kontra un ansiano, si no ta a base di dos òf tres testigu.

 

16. Un hende ku a nase di nobo por mansa su lenga?
Santiago 3:7, 8
7 Pasobra tur sorto di bestia salbahe i parha, di bestia ku ta lastra i bestia di laman ta wòrdu mansá i a wòrdu mansá kaba dor di e rasa humano,
8 ma lenga ningun hende no por mansa. E ta un maldat sin sosiegu i yen di veneno morta!.

 

17. Pakiko nos mester resa pa nos por wòrdu wardá for di usamentu robes di nos abla?
Salmonan 141:3 Pone un guardia na mi boka, O Señor; tene warda na e porta di mi lepnan.

 

18. Ki promesa David a hasi tokante violashon ku su lenga?
Salmonan 39:1 Mi a bisa: "Lo mi warda mi kamindanan, pa mi no hasi piká ku mi lenga; lo mi warda mi boka ku un bosal, tanten ku e malbadonan ta den mi presensia.”

 

19. Kiko ta un remedi sigur kontra kulumnia?
Mateo 22:39 i e di dos ta semehante: 'Stima bo próhimo manera bo mes.
Matteo 7:12 Pesei, tur loke boso kier pa hende hasi pa boso, hasi meskos pa nan, pasobra esaki ta e Lei i e Profetanan.
Tito 3:2 pa no kalumniá ningun hende, pa no ta pleitadó, ma suave, mustrando tur konsiderashon pa tur hende.
Santiago 4:11 No papia malu un di otro, rumannan. Esun ku papia malu di un ruman, òf huzga su ruman, ta papia kontra lei i ta huzga lei; ma si bo huzga lei, bo no ta un kumplidó di lei, sino un hues di djé.

 

20. Ku kiko palabranan papiá no ora ta wòrdu kompará?
Proverbionan 25:11 Un palabra papiá na ora apropiá ta manera un apel di oro den montura di plata.