15. Amonestashonnan i Spiertamentunan

15.1  Orguyo (Wowonan altanero )       

1. Kon Señor ta konsiderá wowonan altanero?
Proverbionan 6:16-19
16 Tin seis kos ku Señor ta odia, si, shete kos ku ta un abominashon p'E:
17 wowonan altanero, un lenga mentiroso, i mannan ku ta drama sanger inosente,
18 un kurason ku ta plania maldat, pianan ku ta lihé pa kore hasi maldat,
19 un testigu falsu ku ta papia mentira, i esun ku ta sembra desunion entre rumannan

2. Kiki ta e antesesor di orguyo?
Proverbionan 16:18 0rguyo ta bin promé ku destrukshon, i un spiritu arogante promé ku kaida.
Proverbionan 29:23 0rguyo di un hende lo rebah'é, ma esun ku ta di spiritu umilde lo risibí onor.

3. Kiko tabata e kousa di kaidan di Satanas?
Ezekiel 28:17 Bo kurason a bira orguyoso pa motibu di bo bunitesa; bo a korumpí bo sabiduria pa motibu di bo splendor. Mi a bentabo abou na suela; Mi a ponebo dilanti di reinan, pa nan mirabo.

4. Kiko ta e aktitut di Dios pa ku e orguyosonan?
Santiago 4:6 Ma E ta duna un grasia mas grandi ainda. Pesei Skritura ta bisa: "Dios ta resistí e orguyosonan, ma ta duna grasia na e umildenan."
Salmonan 40:5 Bendishoná ta e hende ku ta pone su konfiansa den Señor, i ku no ta mira riba e orguyosonan, ni riba esnan ku ta desviá bai tras di mentira.
Salmonan 101:5 Esun ku ta kalumniá su próhimo na sekreto, esei lo mi destruí; lo mi no soportá ningun hende ku tin un mirada altanero i un kurason arogante.
Salmonan 138:6 Pasobra ounke Señor ta halsá, tòg E ta atendé e hende umilde; ma e hende orguyoso E ta konosé djaleu.
1 Timoteo 6:3, 4
3 Si un hende ta siña un doktrina diferente i no ta bai di akuèrdo ku palabranan sano, esnan di nos Señor Jesu-Cristo, i ku e doktrina ku ta segun santidat,
4 e ta orguyoso i no ta komprendé nada; ma e tin un opseshon enkuanto preguntanan kontroversial i pleitamentu tokante di palabra, for di kualnan ta lanta envidia, pleitu, palabra di abuso, sospecho malu,

5. Pa ki motibu nos no mester entregá nos mes na orguyo?
Proverbionan 21:4 Un mirada orguyoso, un kurason halsá, i e lampi di e malbado ta piká.

6. Kiko lo ta un di e pikanan den ultimo dianan?
2 Timoteo 3:2 Pasobra hende lo ta stimadó di nan mes, stimadó di plaka, gabadó, arogante, blasfemadó, desobedesido na mayornan, ingrato, impio,

7. Kon e arogantenan ta wòrdu konsiderá en general?
Malakias 3:15, 16
15 Pesei awor nos ta yama e hendenan arogante, bendishoná; no solamente t'asina ku e hasidónan di maldat ta prosperá, ma tambe nan ta pone Dios na prueba i ta skapa.
16 E ora ei esnan ku a teme Señor a papia ku otro, i Señor a presta atenshon i a tende esaki, i un buki di memoria a wòrdu skirbi Su dilanti pa esnan ku ta teme Señor i ku ta onra Su nòmber.

8. Kiko lo ta e destino di e arogantenan?
Malakias 4:1 "Pasobra mira, e dia ta bin; e lo kima manera fòrnu; i tur e hendenan arogante i kada hasidó di maldat lo ta bagas; i e dia ku ta bin lo sende nan na kandela," e Señor di ehérsitonan ta bisa, "asina ku ni nan rais ni nan rama lo no keda.